17 ліпеня 2019 года ў АЛ «Вясёлка» ДУА «Сярэдняя школа № 39 г. Гродна" прайшоў «Дзень беларускай мовы"
На падставе ліста Аддзела адукацыі, спорту і турызму адміністрацыі Кастрычніцкага раёна г. Гродна «Аб Дні беларускай мовы" 2019/07/17 у ДУА «Сярэдняя школа № 39 г. Гродна" ў АЛ «Вясёлка» прайшоў «Дзень беларускай мовы". У рамках гэтага дня быў арганізаваны шэраг мерапрыемстваў, якія прайшлі пад дэвізам «Рускай мове дай разгрузку - размаўляй па-беларуску". Для пашырэння лексічнага запасу слоў выхаванцаў былі падрыхтаваны і размешчаны «словы-паказальнікі» з назвамі прадметаўшкольнага акружэння. На працягу ўсяго дня «словы-паказальнікі» былі памочнікамі для ўстанаўлення дыялогу на беларускай мове з іншымі людзьмі.
У першай палове дня была праведзена інфармацыйная хвілінка «Мая родная мова - беларуская». Дзецям былі прапанаваны загадкі, прымаўкі, якія яны завяршалі самастойна. У рамках знаёмства з беларускай кінематаграфіяй кінастудыі «Беларусьфільм»быў прапанаваны мультфільм «Піліпка».
Яркай падзеяй гэтага дня была творчая сустрэча з дзіцячай пісьменніцай Гродзеншчыны, членам Саюза пісьменнікаў Беларусі Ганнай Іосіфаўнай Скаржынскай-Савiцкай. У ходзе гэтай сустрэчы Ганна Іосіфаўна распавяла аб сваім дзяцінстве і аб пачатку творчага шляху. Пісьменніца пазнаёміла выхаванцаў лагера са сваімі кнігамі, расказала гісторыю стварэння сваіх твораў і ілюстрацый да іх. Выхаванцам лагера выпаў вялікі гонар стаць першымі слухачамі, якім Ганна Іосіфаўна прадствіла свае новыя вершы. Падарункам і ўдзячнасцю пісьменніцы стала інсцэніроўка казкі «Лісяня і зайчаня» са зборніка «Надзейка-чарадзейка» выхаванцамі 6 атрада. Дзеці таксама прадэманстравалі свае таленты: чыталі аўтарскія вершы і вершы ўласнага сачынення, спявалі песні на беларускай мове. Ганна Іосіфаўна зрабіла выдатны падарунак школе - кнігу казак «Мішка-прывід».
З мэтай развіцця творчага патэнцыялу і ўяўлення была арганізавана выстава «Бульба-чараўніца», на якую выхаванцы прадставілі вырабы з бульбы. Быў праведзены конкурс малюнкаў па творах беларускіх пісьменнікаў "Па беларускіх казках». Выхаванцы маляўніча адлюстравалі свае любімыя творы. Выстава творчых работ даступна для наведвання.
На працягу ўсяго дня праходзіла акцыя «Гавары са мной па-беларуску», у ходзе якой зносіны ў лагеры ажыццяўляліся на роднай беларускай мове. Выхаванцы і выхавальнікі паказалі любоў і пашану да беларускай мовы і беларускай культуры.
